Estudante Creche, inan-aman no manorin sira preparasaun halo jogu. Foto: Lensa Fokupers, 24/10/2025
Sesta-Feira, 24 Outubru 2025; Iha esforsu atu hametin relasaun entre labarik, inan-aman, no Manorin sira, Creche-Knua ba Labarik hala’o Piknik ida ho Estudante, manorin no Inan-Aman sira.
Eventu ne’e hala’o iha ambiente ida ne’ebé ksolok no manas, lori hamnasa, entuziazmu, no momentu folin-boot sira ba família Creche tomak.
Piknik ne’e hetan partisipasaun husi estudante, inan-aman, no edukadór sira hotu iha Creche-Knua ba Labarik. Husi dadeer, labarik sira ho entuziazmu prepara sira-nia an, lori sira-nia sasán, tapete, no ekipamentu halimar nian. Eventu ne’e hahú ho orasaun grupu, tuir fali ho jogu edukativu oioin, kuis, no kompetisaun ki’ik sira ne’ebé envolve kolaborasaun entre labarik no inan-aman sira.
Koordenadora CRECHE, Sra. Epifania Pinto. Foto: Lensa Fokupers, 21/10/2025
Tuir Koordenadóra CRECHE, Sra. Epifania Pinto, katak, atividade ida-ne’e la’ós de’it destina ba rekreasi, maibé mós serve nu’udar forum ida atu hametin lasu emosionál entre labarik, inan-aman, no edukadór sira.
“Ami hakarak fornese atmosfera aprendizajen ida ne’ebé divertidu iha liur klase nian, nune’e labarik sira bele esplora, halo interasaun ho natureza, no harii auto-konfiansa. Hamutuk ho inan-aman sira mós hanesan fundasaun importante ida hodi apoia labarik sira nia dezenvolvimentu”, nia hatete.
Aleinde jogu sira, piknik ne’e inklui mós han hamutuk no sesaun konta istória, iha ne’ebé inan-aman sira troka esperiénsia sira hodi apoia sira nia oan sira nia kreximentu no dezenvolvimentu. Profesór sira mós fó orientasaun no motivasaun atu asegura atividade ne’e la’o ho seguru, ordenadu, no signifikativu.
Atmosfera ksolok ida sai evidente iha loron tomak, ho labarik sira halai, haris iha tasi, hamnasa, no halimar ho sira nia belun sira. Inan-aman sira mós kontente atu gasta tempu ho sira nia oan sira fora hosi sira nia rutina loroloron nian.
Atividade sira hanesan ida-ne’e maka prova tanjível (realidade) katak edukasaun infánsia nian la’ós de’it akontese iha klase laran maibé mós liuhosi esperiénsia prátika sira ne’ebé envolve família sira no komunidade ne’ebé hale’u.
Liuhusi atividade piknik hamutuk ida-ne’e, Creche-Knua ba Labarik hein katak, relasaun armonioza entre eskola, labarik sira, no família sira bele kontinua mantein metin nafatin, hodi nune’e bele suporta kreximentu labarik sira ne’ebé kontente, independente, no ho karakter pozitivu.
