Dili, 10 Dezembru 2025 — Kampaña Loron 16 Ativizmu Kontra Violénsia Hasoru Feto ofisialmente konklui ho Marsa ba Igualdade ne’ebé animadu no unidu. Ho tema “Hamutuk, Hasa’e Konxiénsia Literasia Dijitál no Online Seguru ba Feto no Labarik-Feto iha Diversidade hotu,” eventu ne’e afirma ami nia kompromisu hamutuk hodi haka’as-an ba espasu dijitál ida ne’ebé seguru liu, inkluzivu liu, no livre hosi violénsia bazeia ba jéneru.
Hasa’e Konxiénsia iha Era Dijitál
Iha era ida-ne’e ho teknolojia ne’ebé sempre evolui, feto no labarik-feto sira hasoru forma oioin hosi siberviolénsia, hosi asédiu no intimidasaun to’o propagasaun konteúdu ne’ebé prejudisiál. Liuhusi tema tinan ida-ne’e nian, organizadór sira kampaña nian subliña katak literasia dijitál no seguransa online la’ós de’it koñesimentu adisionál, maibé presiza tebes ba protesaun no empoderamentu.
Partisipantes sira lori spanduk/poster sira hato’o mensajen maka’as sira kona-ba importánsia hosi utilizasaun internet ne’ebé seguru, étiku no responsavel, no mós solidariedade ho sobrevivente sira hosi siberviolénsia no forma sira seluk hosi violénsia bazeia ba jéneru.
Rota Marsa ida ne’ebé signifikativu
Marsa tuir dalan naruk ida ne’ebé simboliza luta koletiva ba igualdade no seguransa:
Nicolau Lobato → Sentru Saúde Komoro → Bombeiros → Golgota → Raikotu → Tasi Tolu
Iha ambitu marsa, partisipante sira hakilar slogan, lori spanduk, no habelar mensajen edukasionál sira ba públiku. Prezensa husi Governu, sosiedade Sivil, Parseiru Dezenvolvimentu sira, PNTL, F-FDTL, Juventude, ativista, Estudantes Universitáriu, Autóridade Komunitária, Sobreviventes sira, Media Nasional no seluk tan hasa’e liután atmosfera solidariedade.
Subliña Kompromisu hamutuk
Konkluzaun husi kampaña ne’e la’ós rohan, maibé hanesan lembransa ida katak esforsu atu kombate violénsia hasoru feto tenke kontinua loron-loron. Edukasaun literasia dijitál, hametin seguransa online, no apoia sobrevivente sira maka parte hotu hosi pasu konkretu sira hodi kria ambiente fíziku no dijitál ida ne’ebé seguru ba ema hotu.
Ho espíritu hamutuk no diversidade, povu Timor-Leste reafirma katak violénsia ho forma saida de’it labele tolera, tantu iha mundu fíziku ka dijitál.
Organiza Marsa ba Igualdade ne’e, Fokupers servisu hamutuk ho Governu liuhusi Sekretaria Estadu ba Igualdade (SEI), hetan apoiu fundus husi Uniaun Europeia.
