Partisipantes sira halo pratika mekanizmu rede referal, Foto: Lensa Fokupers
Ainaro, 6–7 Marsu 2026 — Fokupers hala’o treinamentu kona-ba “Avaliasaun Báziku no Konsellu ba Rede Referál, Igualdade Jéneru, no Prevensaun Violénsia Bazeia ba Jéneru (VBJ)” ba membru Konsellu Suku na’in 23 (feto na’in 5 no mane na’in 18) iha Suku Mulo, Postu-Administrativu Hatubuilico.
Treinamentu ne’e ho objetivu atu haforsa kapasidade lideransa komunitária sira hodi kompriende asuntu igualdade jéneru, familiariza sira-nia an ho mekanizmu rede referál kazu sira, no dezenvolve abilidade báziku sira hodi fornese akonsellamentu inisiál ba vítima violénsia bazeia ba jéneru iha nivel komunidade.
Durante loron rua treinamentu, partisipante sira envolve ativamente liuhosi métodu aprendizajen partisipativu, hanesan diskusaun grupu, estudu kazu, no simulasaun jogu papél. Métodu sira-ne’e dezeña atu asegura katak membru Konsellu suku nian la’ós de’it komprende konseitu teóriku sira maibé mós pratika abilidade sira ne’ebé presiza atu rezolve kazu sira violénsia iha komunidade.
Iha Abertura, Xefe Suku Mulo, Sr. José Florindo Andrade, hateten, membru Konsellu Suku barak maka agora daudaun kompostu hosi líder komunitáriu foun sira, inklui Xefe Aldeia sira ne’ebé foin eleitu. Tanba ne’e, formasaun ne’e fó oportunidade krusiál atu hasa’e sira-nia komprensaun kona-ba igualdade jéneru, mekanizmu rede referál, no maneira apropriadu no sensivel atu trata kazu violénsia iha nivel aldeia.
Xefe Suku mós hato’o nia apresiasaun no agradesimentu ba Fokupers ne’ebé organiza formasaun ne’e. Sira subliña katak estrutura lideransa komunitária nunka hetan treinamentu espesífiku relasiona ho avaliasaun kazu, akonsellamentu báziku, ka prevene violénsia bazeia ba jéneru. Tanba ne’e, Fokupers nia prezensa iha suku Mulo haree nu’udar pasu krusiál ida hodi hasa’e koñesimentu no konxiénsia komunidade nian iha prevensaun no responde ba violénsia bazeia ba jéneru.
Liuhusi atividade ida-ne’e, hein katak Konsellu Suku sira sei hala’o papél ida ne’ebé ativu liután nu’udar liña oin iha komunidade, fó apoiu inisiál ba vítima sira no liga sira ba servisu apropriadu liuhosi rede referál ne’ebé disponivel.
Atividade ne’e apoiu fundus husi Misereor.
