Liquiça 3-5 Dezembru 2025, Fokupers hala’o treinamentu kona-ba “Akonselamentu Báziku, Violénsia Bazeia ba Jéneru (VBJ), no Mekanizmu Sistema Rede Referál” ba membru konsellu Suku Vaviquini, Postu-Administrativu Maubara, Munisípiu Liquiça.
Treinamentu ne’e partisipa husi Xefe Aldeia, Delegadu/a, Xefe Juventude, Servisu Sosiál Suku, no Administrasaun Suku, ho totál feto na’in 10 no mane na’in 15 mak partisipa.
Iha Abertura, Xefe Suku Vaviquini, hato’o ninia apresiasaun ba Fokupers no hein katak treinamentu ida ne’e bele fornese rekursu ne’ebé iha valór ba membru konsellu suku sira hodi hala’o sira nia kna’ar no responsabilidade iha komunidade nia laran. Nia hatete, lider komunitáriu sira iha liña oin, iha kapasidade hodi rezolve problema sira iha nivel suku no aldeia, inklui kazu sira kona-ba Violénsia Bazeia ba Jéneru.
Treinamentu ne’e ho objetivu atu
• Reforsa servisu apoiu no rede referál ba komunidade sira ne’ebé hasoru VBJ.
• Fornese mekanizmu Sistema rede referál ida ne’ebé padronizadu, hodi asegura katak kazu Violénsia Bazeia ba Jéneru, trata ho seguru, efetivu, konfidensiál, no lahó diskriminasaun.
Partisipante sira-nia envolvimentu ativu hatudu kompromisu hamutuk atu hametin sistema protesaun iha nivel komunidade. FOKUPERS kontinua hasa’e konxiénsia, promove ekuidade jéneru, no hametin kolaborasaun intersetoriál hodi kria ambiente ida ne’ebé seguru liu, Iguál, no justu ba ema hotu.
Atividade ne’e hetan apoiu fundus husi SEI.
