Hafoin sosializasaun remata, fasilitador ho partisipantes sira foto hamutuk, Foto: Lensa Fokupers
Ainaro, 8 Marsu 2026 – Iha Selebrasaun Loron Internasionál Feto, Fokupers hala’o atividade sosializasaun kona-ba Prevensaun Violénsia Bazeia ba Jéneru (VBJ) ba juventude na’in 30 iha Suco Mulo, Postu Administrativu Hatobuilico, Munisípiu Ainaro.
Atividade ida ne’e ho objetivu atu hasa’e komprensaun públiku, liu-liu juventude, kona-ba violénsia bazeia ba jéneru no esforsu prevensaun iha família no komunidade.
Liuhusi sosializasaun ida-ne’e, partisipante sira aprende kona-ba definisaun VBJ, forma violénsia oioin ne’ebé akontese beibeik iha sosiedade, nia impaktu ba vítima sira, no pasu sira ne’ebé komunidade sira bele foti atu prevene violénsia.
Aleinde fó koñesimentu, atividade ne’e fó mós espasu diskusaun ba juventude sira hodi kompriende importánsia atu kria ambiente ne’ebé seguru, respeitu, no livre husi violénsia.
Prevene violénsia bazeia ba jéneru la’ós de’it responsabilidade vítima sira-nian, maibé nu’udar responsabilidade ba komunidade tomak. Tanba ne’e, atividade edukasaun públika hanesan divulgasaun ne’e nu’udar pasu estratéjiku ida hodi harii konxiénsia koletiva, hametin solidariedade sosiál, no promove kultura anti-violénsia iha sosiedade.
Iha atividade sira-ne’e, foin-sa’e sira mós hetan enkorajamentu atu hala’o papél ativu nu’udar ajente mudansa nian iha sira-nia komunidade, liuhosi promove valór sira respeitu ba malu, solidariedade, no protesaun ba feto, labarik sira, no grupu vulneravel sira seluk.
Liuhusi komemorasaun Loron Internasionál Feto ida-ne’e, Fokupers, hamutuk ho komunidade, reafirma ninia kompromisu atu kontinua promove igualdade jéneru no hametin esforsu prevensaun violénsia iha sosiedade Timor-Leste.
Atividade ne’e apoiu finanseiru husi Misereor.
Hamutuk ho komunidade no foin-sa’e sira, Fokupers kontinua haforsa lian sira kontra violénsia no harii futuru ida ne’ebé respeita feto no labarik sira-nia direitu.
