Fasilitadora Fokupers, Sra. Noela B. da Silva Freitas, esplika hela ba partisipantes priense formatu planu negosiu Ki’ik. Foto: Lensa Fokupers, 27/08/2025
Ami foin kompleta treinamentu intensivu ida kona-ba Merkadória no Jestaun Finanseira ne’ebé dezeña espesífikamente ba na’in ba negósiu ki’ik sira. Partisipante na’in 23 husi munisipiu 10, ne’ebé maka partisipa durante loron 2, hatudu entuziazmu ne’ebé maka’as tebes hodi hametin sira nia fundasaun negósiu nian!
📌 Tópiku sira ne’ebé aprende:
✅ Tékniku hatudu produtu ne’ebé atrai konsumidór sira
✅ Estratéjia sira ba organiza sasán sira folin lalais
✅ Oinsá atu rejista ho di’ak finansas negósiu nian
✅ Jere osan ho loos & evita husi deve
✅ Determinasaun ba folin fa’an ne’ebé maka lukrativu
💬 “Treinamentu ne’e loke tebes hanoin. Agora ha’u hatene oinsá atu organiza ha’u-nia negosiu atu halo nia sai atrativu liután no jere ha’u-nia finansas negósiu nian ho matenek liután.” Hateten partisipante ida.
Hafoin de treinamentu, partisipantes foto hamutuk ho Fasilitadora. Foto: Lensa Fokupers, 26/08/2025.
Ami fiar katak sobrevivente ne’ebé forte hahú ho emprezáriu sira ne’ebé edukadu. Obrigadu ba partisipante sira hotu ne’ebé akompaña to’o remata. Ami espera matenek ne’ebé fahe Partisipantes sira bele aplika koñesimentu ne’ebé hetan hodi hasa’e kompetitividade, efisiénsia, no sustentabilidade husi sira nia negósiu iha dinámika merkadu. Hafoin de remata treinamentu, Fokupers sei apoiu fundos ki’ik ba sobrevivente sira hodi hala’o negosiu ki’ik tuir planu negosiu ne’ebé mak sira iha ona. Atividade ne’e hetan apoiu fundus husi doador Social Investors.
Sobrevivente ne’ebé partisipa treinamentu ne’e mai husi munsipiu 10, Likisa, Ermera, Covalima, Viqueque, Bobonaro, Aileu, Manatutu, Dili, Ainaro no Baucau.
