Programa Manajer WVTL iha Covalima Sr. Joao Moniz, hato’o introdusaun programa POWER nian iha atividade workshop. Foto: Lensa Fokupers
Covalima, 24 Fevereiru 2026 – World Vision Timor-Leste kolaborasaun ho Fokupers, hala’o workshop Konsultasaun ho Parseiru Interesadu kona-ba Plataforma Feto sira hodi Promove involvimentu Ativu Feto iha Atividade Ekonomika. Partisipante na’in 35 (Feto 16 no Mane 19).
Workshop ne’e ho objetivu atu kria espasu ida ba diálogu no hadi’a grupu sira-nia komprensaun kona-ba oinsá atu asesu ba fundu rotativa no fasilidade kréditu. Liután, fó apoiu ba feto sira ho idade serbisu mínimu atu sai empoderadu liután hodi dezenvolve sira-nia empreza ekonómika, enkuantu enkoraja mós grupu feto sira atu habelar asesu ba merkadu, husi nivel lokál to’o nivel nasionál.
Iha sesaun diskusaun, partisipante sira aborda dezafiu oioin ne’ebé feto sira hasoru bainhira hetan asesu ba finansiamentu, inklui falta informasaun, garantia, no rede negósiu ne’ebé limitadu. Liuhusi aprosimasaun kolaborativu, workshop ne’e fó komprensaun kona-ba mekanizmu fundu rotativu, prosedimentu aplikasaun kréditu, no estratéjia sira atu hametin kapasidade grupu negósiu feto sira-nian.
Plataforma Feto ne’ebé promove iha atividade ne’e hein katak sei sai hanesan plataforma kompartillada hodi hametin solidariedade, hadi’a literasia finanseira, no harii parseria estratéjiku hodi habelar feto sira-nia oportunidade ekonómika.
Atividade ne’e hetan partisipasaun husi reprezentante sira husi instituisaun no ajénsia oioin, inklui Ministériu Agrikultura, SEFOPE, SECOOP, Diretór Ministériu Edukasaun munisipiu Covalima, Pontu Fokál Sekretária Estadu ba Igualdade (SEI), Xefe VPU-PNTL iha Covalima, IADE, SERVE,IP, RHTO, Uma-mahon Fokupers, Lideransa Komunitaária no parte interesada sira seluk.
Envolvimentu multi-setorál ida-ne’e hatudu kompromisu kompartilladu hodi apoia feto sira-nia empoderamentu ekonómiku nu’udar parte ida hosi dezenvolvimentu inkluzivu iha Timor-Leste.
Workshop ida ne’e halo parte iha Programa POWER ne’e, hetan fundus husi Uniaun Europeia hamutuk ho parseiru konsorsiu lidera husi World Vision Australia no implementador FEEO no Fokupers, hamahan-aan iha World Vision atu suporta feto Timor-oan asesu ba oportunidadde ekonomia ne’ebé hanesan no valoriza feto nia partisipasaun iha atividade emprezariál.
Liuhusi kolaborasaun no kompromisu kontínua, atividade ida-ne’e hein atu hametin feto sira-nia pozisaun nu’udar atór ekonómiku independente, kompetitivu, no kontribui maka’as ba kreximentu ekonómiku família no komunidade sira iha Covalima.
