Fokupers halo sensibilizasaun kona-ba Prevensaun Asédiu Seksuál no VBJ iha UNTL. Foto: Lensa Fokupers. Data, 29/05/2026
Dili, 29 Maiu 2026 – Fokupers halo sensibilizasaun kona-ba Prevensaun Asédiu Seksuál no Violénsia Bazeia ba Jéneru (VBJ) ba estudante na’in 131 (Feto 89 no Mane 49) iha Universidade Nasionál Timor Lorosa’e (UNTL). Atividade ne’e halo iha Auditóriu Fakuldade Siénsia Sosiáis no Polítika (FASPOL), Kaikoli, no envolve estudantes husi departamentu ualu.
Atividade ne’e ho objetivu atu hasa’e konxiénsia iha komunidade akadémika kona-ba forma oioin hosi asédiu seksuál no violénsia bazeia ba jéneru, enkuantu mós introdús instrumentu legál sira ne’ebé disponivel atu proteje vítima sira. Aleinde ne’e, divulgasaun ne’e mós ho objetivu atu fornese edukasaun kona-ba esforsu prevensaun violénsia seksuál, enkoraja korajen atu ko’alia no relata kazu sira ne’ebé esperiénsia ka hatene, no hametin koordenasaun intersetoriál iha mekanizmu referénsia VBJ nia laran iha nivel lokál no universitáriu.
Durante sesaun sensibilizasaun, estudante sira hetan komprensaun di’ak liu kona-ba mekanizmu referral servisu ba sobrevivente VBJ nian no prosedimentu sira atu hato’o keixa sira kona-ba kazu VBJ, tantu liuhosi mekanizmu dixiplinár internu no prosesu responsabilizasaun kriminál nian.
Partisipante sira mós aprende kona-ba forma oioin hosi asédiu seksuál, impaktu ba vítima sira, no importánsia atu harii ambiente kampus ida ne’ebé seguru, inkluzivu, no livre hosi violénsia.
Nu’udar parte ida husi kompromisu ba prinsípiu inkluzividade, atividade ne’e mós garante envolvimentu husi Ema ho Defisiénsia (EhD). Etapa ida-ne’e foti atu asegura katak ema ida-idak iha oportunidade hanesan atu partisipa no asesu ba informasaun kona-ba prevensaun VBJ.
Atividade ne’e, hetan partisipasaun husi parte interesada prinsipál oioin, inklui Vise Reitór ba Asuntu Estudantil UNTL, Diretóra Fokupers, Adjunta Koordenadóra Gabinete de Apoio à Sociedade Civil (GASC), Diretór Sentru ba Igualdade Jéneru UNTL, Dekanu FASPOL no estrutura sira, Provedór Estudante UNTL, no estudante sira husi departamentu ualu (Administrasaun Públika, Siénsia Polítika, Polítikas Públikas, Komunikasaun Sosiál, Relasaun Internasionál, Dezenvolvimentu Komunitáriu, Inkluzaun komunitaria sosiál, no Sosiologia).
Liuhusi atividade ne’e, Fokupers subliña importánsia kolaborasaun entre instituisaun edukasionál, organizasaun sosiedade sivíl, governu, no estudante sira hodi kria ambiente edukasionál ne’ebé respeita direitus umanus, tane aas igualdade jéneru, no fó protesaun efetivu ba vítima VBJ.
Atividade sensibilizasaun ne’e sai posivel tanba apoiu husi Gabinete de Apoio à Sociedade Civil (GASC) no kolaborasaun ho AJHJ-TL, ne’ebé fasilita implementasaun atividade refere.
FOKUPERS hato’o ninia apresiasaun no gratidaun ba GASC ba ninia apoiu hodi implementa programa sensibilizasaun ne’e, no ba AJHJ-TL ninia kooperasaun no kontribuisaun hodi hametin esforsu sira atu prevene no rezolve asédiu seksuál no violénsia bazeia ba jéneru iha kampus.
Hamutuk, ita bele kria espasu aprendizajen ida ne’ebé seguru, inkluzivu, no livre hosi violénsia ba ema hotu.
