Fokupers hala’o Reflesaun Treinamentu kona-ba Haforsa Mekanizmu Referál Kazu VBJ ba Estrutura Suku Betano. Foto:Lensa Fokupers. Data: 1-2/09/2026
Fokupers hala’o Reflesaun Treinamentu kona-ba Haforsa Mekanizmu Referál Kazu Violénsia Bazeia ba Jéneru (VBJ) ba membru na’in 20 husi Estrutura Konsellu Suku Betano, Postu Administrativu Same, Munisípiu Manufahi.
ReflesaunTreinamentu ida ne’e, hanesan parte ida husi Fokupers nia esforsu atu garante kontinuidade husi koñesimentu ne’ebé partisipante sira hetan liu husi treinamentu anteriór kona-ba mekanizmu referál ba kazu VBJ. Liutiha fulan neen, atividade ida-ne’e fó espasu ba partisipante sira atu hametin sira-nia komprensaun, reflete kona-ba sira-nia esperiénsia hodi aplika koñesimentu ne’e iha komunidade, no identifika dezafiu oioin ne’ebé hasoru hodi responde ba kazu VBJ.
💬 Hamutuk, sira diskuti:
- Konseitu kona-ba jéneru no VBJ
- Impaktu husi violénsia ba vítima/sobrevivente sira
- Resposta sira ne’ebé sentradu iha vítima
- Mekanizmu referál kazu
- Papel Lideransa komuntária atende sobrevivente VBJ
- Planu asaun iha nivel komunidade
Treinamentu ida-ne’e la’ós de’it hanoin fila-fali materia, maibé ida-ne’e hanesan pasu ida atu asegura katak, bainhira vítima/sobrevivente ida presiza ajuda, iha ema, iha komunidade ne’ebé prontu atu atua ho apropriadu, ho seguru, no ho empatia.
Fokupers hein katak, kapasitasaun ida ne’e bele hametin mekanismu referál no koordenasaun ho fornesedor servisu na’in sira, atu nune’e vitima/sobrevivente sira bele hetan apoiu ne’ebe seguru no apropriadu.
🙏 Fokupers hato’o apresiasaun no agradesimentu ba Yayasan Humanis ba apoiu finanseiru ne’ebé halo atividade kapasitasaun ne’e sai posivel.
Tuir ita-boot nia hanoin, saida mak importante liu ba lideransa komunitariu sira halo bainhira sira hatene kona-ba kazu violnsia bazeia ba jéneru?
💬 Fahe ita-boot nia hanoin sira iha komentáriu no fahe mensajen ida-ne’e atu ema barak liután komprende importánsia hosi resposta ida ne’ebé seguru no sentradu iha vítima.
