Treinamentu Sesaun dahuluk foku ba “Hasa’e Forsa, Konfiansa no Kuidadu-an”. Foto:Lensa Fokupers. Data:25/8/2026
Dili, 25–27 Agostu 2026: Fokupers kontinua haforsa kapasidade sobrevivente Violénsia Bazeia ba Jéneru (VBJ) na’in 31, liuhosi Pakote Mentoring no Formasaun ba Hasa’e Kapasidade Sobrevivente VBJ, ho tema “Husi Sobrevivente ba Lider, Organisadóra no Liña oin iha Advokasia Komunidade.”
Formasaun ida-ne’e nu’udar parte ida husi Fokupers nia kompromisu atu garante katak, sobrevivente VBJ la’ós de’it haree nu’udar benefisiáriu husi servisu sira, maibé mós iha oportunidade atu dezenvolve sai líder, organizadóra, influensiadór, no defensór iha liña oin (Frontline) ba mudansa iha komunidade.
Sesaun dahuluk foka ba “Hasa’e Forsa, Konfiansa no Kuidadu-an”, hodi kria espasu seguru ba sobrevivente sira atu rekoñese sira-nia forsa, identidade, valór an rasik, sistema apoiu no nesesidade kuidadu-an no seguransa.
Programa ne’e iha vizaun ne’ebé kle’an, fó kbiit ba sobrevivente VBJ na’in 26 atu sai líder, organizadór komunitáriu, influensiadór, no defensór iha liña oin, hakbi’it atu lidera sira-nia an rasik, organiza no mobiliza feto sira iha sira-nia komunidade, promove igualdade jéneru, prevene VBJ, no halo advokasia ba mudansa sosiál no polítika husi nivel komunidade to’o nivel nasionál.
Programa empoderamentu ne’e sei implementa durante tinan tolu (2026-2028). Durante períodu ne’e, sobrevivente na’in 26, partisipa treinamentu tinan ida dala rua, ho tópiku oioin tuir sira-nia nesesidade kapasitasaun.
Programa ne’e implementa ho apoiu finanseiru husi CARE no Misereor, nu’udar parte ida husi esforsu kolaborativu atu haforsa kapasidade sobrevivente sira no kria ambiente ida ne’ebé seguru, justu, igual, no livre husi violénsia bazeia ba jéneru.
