Programa Aman ba Mudansa sesaun da-V iha Aileu. Foto: Lensa Fokupers. Data: 23/05/2026
Aileu, 23 Maiu 2026 – FOKUPERS kontinua nia sesaun ba dala lima ba Programa “Aman ba Mudansa” ho kaben-na’in 15 iha Suku Namolesso, Postu Administrativu Lequidoe, Munisípiu Aileu. Programa ne’e ho objetivu atu hametin mane sira-nia knaar hodi apoia saúde reprodutiva, harii relasaun família ne’ebé saudavel, no kria ambiente família ne’ebé hakmatek no livre husi violénsia.
Iha sesaun dalimak ne’e, foku liu ba “Apoiu Inan Isin-rua.” Diskusaun ne’e foka ba importánsia involvimentu mane nian durante inan isin-rua, inklui akompaña parseiru sira ba vizita Kuidadu Antenatal (ANC) no fó apoiu fíziku no emosionál ba inan isin-rua sira.
Iha sesaun tomak, partisipante sira diskute kona-ba responsabilidade no knaar oin-oin mane nian hodi asegura saúde inan no bebé sira nian. Tópiku sira ne’ebé kobre inklui importánsia atu kria ambiente ida ne’ebé livre hosi violénsia, asegura nutrisaun di’ak, apoiu emosionál, deskansa adekuadu ba inan isin-rua sira, no prepara ba partu no bebe moris.
Liuhusi atividade drama no diskusaun grupu, partisipante sira aprende katak prezensa no envolvimentu mane sira nian durante inan isin-rua iha impaktu signifikativu ba konfortu no saúde inan nian. Mane sira mós aprende kona-ba importánsia atu fahe serbisu uma-laran nian, akompaña sira-nia parseiru durante vizita kuidadu antenatal, no foti desizaun hamutuk atu prevene risku saúde nian ba inan no bebé.
Atividade, “Vizita ANC”, ajuda kaben-na’in sira atu komprende benefísiu sira hosi ezame pré-natal regulár sira. Partisipante sira komprende katak, prezensa husi mane sira durante vizita ANC nian la’ós de’it apoia inan emosionalmente maibé mós ajuda kaben-na’in sira atu komprende saúde inan no bebé nian no prepara di’ak liután ba partu.
Liuhusi programa “Aman ba Mudansa”, FOKUPERS kontinua enkoraja mane sira-nia partisipasaun ativa iha saúde reprodutiva no kuidadu família nian nu’udar parte ida hosi esforsu sira atu harii família sira ne’ebé saudavel, armonia, no livre hosi violénsia.
Aleinde atividade ba kaben-na’in sira, Fokupers mós fornese atividade aprende liuhusi halimar ho labarik sira hodi fó espasu ba inan-aman sira atu partisipa ho ativu. Labarik na’in 15 partisipa ho ativu, aprende valór sira igualdade nian, respeitu ba malu, no moris lahó violénsia hosi idade ki’ik.
Sesaun ne’e fasilita husi Sra. Lucia Fatima da Silva no Sr. Silveiro da Silva de Araujo.
Programa ne’e finansia husi Misereor ho apoiu tékniku husi The Asia Foundation – Nabilan no ONG HAMNASA.
