Foto hamutuk entre Ekipa Fokupers ho Konsellu suku Balibo, Foto: Lensa Fokupers, Date: 25/5/2026
Balibo, 25–26 Maiu 2026 – Fokupers hala’o treinamentu kona-ba “Akonselamentu, Rede Referál, Igualdade Jéneru, no Prevensaun Violénsia Bazeia ba Jéneru (VBJ)” ba lideransa komunitária na’in 26 (Feto 13 no mane 13), iha Suku Balibo, Munisípiu Bobonaro.
Treinamentu ne’e ho objetivu atu hasa’e lideransa komunitária sira no foin-sa’e sira-nia komprensaun kona-ba konseitu igualdade jéneru no violénsia bazeia ba jéneru (VBJ), enkuantu haforsa mós sira-nia kapasidade atu fó apoiu ba vítima violénsia liuhosi rede referral.
Aleinde diskute konseitu báziku kona-ba jéneru no VBJ, treinamentu ne’e mós fornese koñesimentu báziku no abilidade iha akonsellamentu, hodi permite partisipante sira atu fó apoiu inisiu ne’ebé apropriadu ba vítima ka indivídu sira ne’ebé afetadu husi VBJ molok halo refrerral ba servisu espesializadu liu.
Liuhusi atividade ida-ne’e, Fokupers buka atu hametin lider lokál no foin-sa’e sira-nia knaar nu’udar ajente ba mudansa no protetór komunitáriu ne’ebé iha kapasidade atu kria espasu ne’ebé seguru, inkluzivu, no akollidu ba feto, labarik-feto, no grupu vulneravel sira seluk ne’ebé esperiénsia ka iha risku ba violénsia.
Treinamentu ne’e mós fó oportunidade ba autoridade komunitária sira atu komprende oinsá identifika, responde, no refere kazu VBJ tuir prosedimentu ne’ebé estabelese ona. Liután, atividade ida-ne’e enkoraja reforsa koordenasaun no kooperasaun entre autoridade komunitária sira no instituisaun relevante oioin hodi garante vítima sira hetan servisu apropriadu no kria ambiente ida ne’ebé respeita direitus umanus no livre hosi forma violénsia hotu-hotu.
Fokupers fiar katak, envolvimentu ativu hosi lider lokál sira nu’udar fatór krusiál hodi hametin esforsu prevensaun violénsia no promove igualdade entre feto no mane iha nivel komunidade. Hodi aumenta partisipante sira-nia koñesimentu no kapasidade, hein katak sira sei sai fonte informasaun ne ebé efetivu, defensór, no ligasaun ba komunidade sira ne’ebé presiza apoiu no servisu relasiona ho VBJ.
Partisipante treinamentu mai husi membru konsellu suku, xefe suku, delegadu suku, lideransa komunitaria, pesoal administrasaun suku, no estudante estajiariu sira. Sira reprezenta aldeia hitu: Amandato, Atara, Balibo Villa, Belola, Builekun, Fatuk Laran, no Fatululik.
Liuhusi atividade ne’e, Fokupers reafirma nia kompromisu atu hametin protesaun komunitária, hasa’e konxiénsia kona-ba igualdade jéneru, no harii komunidade ne’ebé seguru no livre husi violénsia bazeia ba jéneru iha Timor-Leste.
Treinamentu ne’e hetan apoiu fundus husi Misereor.
