Sesaun dala-11 hosi Programa “Aman ba Mudansa” iha suku Namolesso. Foto: Lensa Fokupers. Data: 9/07/2026
Namolesso, 9 Jullu 2026 – FOKUPERS kontinua nia sesaun ba dala-11 hosi Programa “Aman ba Mudansa”, ho kaben-na’in na’in 15 iha Suku Namolesso, Postu Administrativu Lequidoe, Munisípiu Aileu. Programa ida ne’e hanesan parte ida husi FOKUPERS nia esforsu atu hametin kna’ar mane sira nu’udar parseiru ne’ebé iguál hodi harii família ne’ebé seguru, armoniozu, no livre husi violénsia.
Iha sesaun ba dala-11, Foku ba Identifikasaun Violénsia. Liuhosi métodu aprendizajen partisipativu oioin, diskusaun grupu, no reflesaun kolaborativa, partisipante sira hetan enkorajamentu atu rekoñese dinámika relasaun família nian no identifika forma violénsia oioin ne’ebé persiste, tantu iha uma laran no mós iha komunidade.
Iha prosesu aprendizajen tomak, partisipante sira reflete kona-ba oinsá relasaun saudavel harii iha konfiansa mútua, respeitu, no komunikasaun ne’ebé iguál. Sira mós komprende katak, podér la’ós instrumentu ida atu kontrola ka hanehan parseiru ida, maibé responsabilidade ida atu proteje, respeita, no apoia malu ba membru família hotu-hotu nia moris-di’ak.
Diskusaun sira ne’ebé la’o daudaun hatudu, partisipante sira-nia konxiénsia ne’ebé buras daudaun katak, violénsia la’ós de’it fíziku, maibé bele mós iha forma emosionál, psikolójiku, ekonómiku, no forma sira seluk ne’ebé bele estraga relasaun família no moris-di’ak. Konxiénsia ida-ne’e hanesan pasu krusiál ida hodi prevene violénsia bazeia ba jéneru hosi ambiente família nia laran.
Liuhusi Programa “Aman ba Mudansa”, FOKUPERS kontinua enkoraja envolvimentu ativu mane sira nian nu’udar ajente mudansa nian ne’ebé bele harii relasaun hanesan ho feto sira, fahe responsabilidade iha família laran, no kria ambiente seguru ba feto no labarik sira.
FOKUPERS fiar katak, mudansa sosiál hahú iha família. Bainhira feto no mane fahe podér hanesan, komunika ho respeitu, no kolabora iha foti desizaun, bele realiza família ne’ebé saudavel, seguru, hakmatek, no livre husi violénsia.
Mensajen Xave:
“Mudansa hahú ho ita. Bainhira mane no feto fahe podér hanesan, komunika ho respeitu, no serbisu hamutuk, ita bele harii família sira ne’ebé saudavel, seguru no hakmatek.”
Programa ne’e finansia husi Misereor ho apoiu tékniku husi The Asia Foundation – Nabilan no ONG HAMNASA.
