Fokupers halo Akompañamentu no mentorizasaun regular ba grupu sobrevivente VBJ iha Bobonaro. Foto: Lensa Fokupers. Data; 9/11/2026
Bobonaro, 9 Novembru 2026; Fokupers hala’o atividade Akompañamentu no mentorizasaun regular ba grupu sobrevivente Violénsia Bazeia ba Jéneru (VBJ) iha Bobonaro, ne’ebé partisipa husi partisipante na’in 13.
Atividade ne’e ho objetivu atu halo seguimentu ba progresu no nesesidade sobrevivente sira nian, enkuantu hametin sira nia kapasidade, konfiansa, solidariedade, no lideransa iha advokasia ba direitu feto no igualdade jéneru.
Liuhusi atividade ne’e, Fokupers fornese espasu ida ne’ebé seguru no respeitu ba sobrevivente sira atu fahe esperiénsia, espresa nesesidade sira, identifika dezafiu sira, no harii apoiu mútuo. Prosesu mentorizasaun mós enkoraja hametin komunikasaun, lideransa, planeamentu asaun, no abilidade advokasia tuir partisipante ida-idak nia prontidaun no preferensia.
Iha diskusaun grupu, sobrevivente sira fahe dezafiu oioin ne’ebé sira hasoru nafatin iha sira nia moris loroloron. Dezafiu sira-ne’e inklui asesu limitadu ba dokumentu administrativu no servisu públiku sira, falta sensibilidade ba jéneru entre lideransa lokál sira, no falta konfidensialidade ne’ebé garantidu iha kazu violénsia sira.
Aleinde ne’e, sira mós revela asesu limitadu ba apoiu sosiál no oportunidade ekonómika sira, direitu ba rai no propriedade ne’ebé la kumpre, no falta kuidadu saúde mentál ne’ebé adekuadu no servisu apoiu nian. Kestaun sira kona-ba asesu ba bee-moos no obrigasaun atu selu taxa hodi hetan karta deklarasaun iha nivel suku sai mós preokupasaun ne’ebé partisipante sira hato’o.
Esperiénsia no dezafiu sira-ne’e fornese informasaun importante atu identifika barreira sira no formula solusaun prátika sira hodi permite feto sobrevivente sira atu partisipa ho seguru iha atividade no advokasia komunidade nian. Fokupers mós enkoraja hametin mentorizasaun, solidariedade, no apoiu entre sobrevivente sira, enkuantu respeita privasidade, no desizaun sira hosi indivíduu ida-idak.
Liuhusi mentorizasaun regulár ida-ne’e, Fokupers hein katak, feto sobrevivente sira la’ós de’it hetan apoiu iha sira-nia prosesu rekuperasaun, maibé mós hetan konfiansa hodi hato’o sira-nia direitu, partisipa iha foti desizaun, no nu’udar ajente ba mudansa iha sira-nia família no komunidade.
Feto sobrevivente sira nia lian importante. Tenke respeita sira-nia direitu, rona sira-nia nesesidade, no tenke garante espasu seguru ba partisipasaun.
Programa ne’e implementa ho apoiu fundus husi Uniaun Europeia liu husi konsórsiu husi Care iha Timor-Leste no Fokupers.
