Fasilitador Fokupers Silveiro da Silva de Araujo, fahe informasaun ba Partisipantes sira iha suku Fatuquero, Foto: Lensa Fokupers
Ermera, 9–11 Dezembru 2025 — Forum Komunikasaun Feto Timor-Leste (FOKUPERS) hala’o treinamentu no sosializasaun kona-ba “akonselamentu báziku no sistema rede referál ba Joven no lideransa komunitáriu.” Atividade loron tolu ne’e hala’o iha Suku Fatuquero, Postu Administrativu Railaco, Munisípiu Ermera.
Atividade ne’e, ho objetivu atu hasa’e koñesimentu no hasa’e papél ativu joven feto no mane sira hodi prevene violénsia hasoru feto no labarik feto sira iha Timor-Leste. Liután, partisipante sira hetan materia ho komprensaun ida kona-ba mekanizmu sira hosi sistema rede referál, ne’ebé permite sira atu kanaliza no hato’o informasaun ho efetivu no lideransa komunitária sira mak sai atór xave ba prevene violénsia hasoru feto no labarik sira.
Sesaun sosializasaun ne’e hetan partisipasaun husi juventude na’in 26, kompostu husi feto 22 no mane 4. Entretantu Treinamentu Lideransa Komunitária ne’e hetan partisipasaun husi partisipante na’in 31, kompostu husi feto 30 no mane 1. Nivel aas hosi partisipasaun hosi feto sira reflete kompromisu forte atu hametin lideransa feto nian hodi prevene no rezolve violénsia bazeia ba jéneru iha nivel komunidade.
Partisipantes sira halo pratika kona-ba Sistema rede referal liuhusi dada tali rafi
Liuhusi fahe materia no diskusaun interativu sira, FOKUPERS enkoraja partisipante sira atu komprende papél akonsellamentu báziku nian nu’udar pasu dahuluk hodi apoia sobrevivente sira, no mós importánsia hosi rede referál ne’ebé efetivu ba asesu oportunu no apropriadu ba servisu protesaun no rekuperasaun nian.
Atividade ida-ne’e sai posivel ho apoiu finanseiru husi Misereor, nu’udar parte ida husi kompromisu ne’ebé fahe hodi haforsa kapasidade komunidade nian hodi kria ambiente ida ne’ebé seguru, justu, no livre husi violénsia ba feto no labarik sira iha Timor-Leste.
