Fokupers fasilita treinamentu Mikro Empreza ba Sobrevivente na’in 27. Foto:Lensa Fokupers. Data:7-9/7/2026
Dili, 7–9 Jullu 2026 – Fokupers hala’o treinamentu kona-ba “Empreendedorizmu, Marketing, no Jestaun Finanseiru ba negosiu ki’ik” ba sobrevivente violénsia bazeia ba jéneru (VBJ) na’in 27 husi munisípiu neen (Bobonaro, Covalima, Ermera, Aileu, Oe-cusse, Liquica, Manufahi, Viqueque, no Dili). Treinamentu ne’e hala’o durante loron tolu iha Salaun Marfin-Farol.
Atividade ne’e ho objetivu atu haforsa kapasidade ekonómika sobrevivente VBJ, nune’e sira bele dezenvolve negósiu ki’ik ne’ebé sustentável, hasa’e rendimentu família nian, no hametin sira-nia independénsia ekonómika. Hodi hadi’a sira-nia abilidade emprezariál, partisipante sira hein atu kontribui ba sira-nia an rasik no sira-nia família nia moris-di’ak, enkuantu hamenus risku violénsia iha sira-nia moris.
Durante treinamentu, partisipante sira hetan koñesimentu no abilidade prátika relasiona ho jestaun negósiu, estratéjia marketing, no jestaun finanseira ne’ebé efetivu. Atu asegura prosesu aprendizajen ne’e ativu no relevante ba partisipante sira-nia nesesidade, Fokupers implementa metodolojia partisipativu oioin, inklui Modelu Negósiu, estudu kazu, jogu papél, serbisu individuál no grupu, simulasaun negósiu, aprezentasaun planu negósiu, no reflesaun individuál.
Aleinde sesaun formasaun sira, eventu ne’e konta mós ho instituisaun oioin ne’ebé iha relasaun, hanesan SERVE-IP) no SeCoop, ne’ebé fahe informasaun kona-ba servisu no oportunidade sira ne’ebé emprezáriu sira bele utiliza. Informasaun ida-ne’e inklui asesu ba mikrokréditu, mentorizasaun negósiu, no prosesu rejistu negósiu legál.
Atu inspira no motiva partisipante sira, treinamentu ne’e involve mós emprezariu lokál balun, inklui HA HA, Uma Lafatik, Abundant Water, no Maun Kiera. Emprezáriu sira-ne’e fahe sira nia viajen sira harii no dezenvolve sira nia negósiu, inklui dezafiu sira ne’ebé sira hasoru no estratéjia sira atu hetan susesu.
Sesaun ida ne’ebé hetan atensaun espesiál maka sesaun fahe ida hosi HAHA, Uma Lafatik no Maun Kiera, emprezária ida ne’ebé dezenvolve ona sira nia negósiu ho susesu. Liuhusi istória moris nian kona-ba luta, susesu, no dezafiu sira, partisipante sira hetan hanoin no enkorajamentu ne’ebé iha valór atu kontinua dezenvolve sira nia negósiu.
Atividade ida-ne’e hanesan plataforma aprendizajen ida ne’ebé la’ós de’it hasa’e partisipante sira-nia kapasidade téknika, maibé mós hametin sira-nia konfiansa no forsa atu sai feto independente ekonomikamente. Ho apoiu ne’ebé loos, sobrevivente sira bele harii futuru ida ne’ebé seguru, produtivu liu, no iha kbiit.
Treinamentu ne’e sai posivel tanba hetan apoiu finanseiru husi Social Investors no Humanis, ne’ebé iha nafatin kompromisu atu apoia empoderamentu ekonómiku ba feto no sobrevivente husi violénsia bazeia ba jéneru iha Timor-Leste.
