Benefisiariu Marco ho nia kaben-Mahata,Oecusse. Foto:Lensa Fokupers. Data:08/04/2026
Marco, aman ba oan na’in lima husi Aldeia Mahata, Oecusse, no Sekretáriu ba Grupu Poupansa no Produsaun Anhapi Bisoni, transforma ona nia moris liu husi Projetu Promosaun ba Feto liuhusi Empoderamentu Ekonómiku no Direitu (POWER) ne’ebé finansia husi União Europeia (UE) no apoiu fasilita husi Fundasaun Esperansa Enklave Oecusse FEEO.
Molok tama iha grupu, Marco ho nia família luta ho rendimentu agríkola ne’ebé ki’ik no la konfiável fallansu ai-han husi peste dalabarak halo sira labele hatán ba nesesidade loroloron nian. “Ami nia rendimentu la to’o atu hatán ba ami nia família nia nesesidade sira,” nia fahe.
Iha 2025, Marco ajuda forma Grupu Anhapi Bisoni, iha ne’ebé membru sira poupa beibeik no asesu ba empréstimu ki’ik sira hodi apoia atividade sira ne’ebé hamosu rendimentu empréstimu $50, Marco hahú fa’an Bua-Malus no agora hetan osan besik $6 kada loron, hodi ajuda hadi’a nia família nia estabilidade.
Aleinde rendimentu, programa ne’e mós muda nia hanoin. Liuhusi formasaun kona-ba jestaun finanseira no moris-di’ak família nian, Marco aprende kona-ba igualdade jéneru iha uma alende ne’e mos halo nia fiar an atu jere finansas no planu ba futuru dadaun ne’e nia bele hari ona uma ida ne’ebé adekuadu ba nia ho nia familía.
“Uluk ha’u hanoin serbisu uma laran ne’e ba feto de’it, agora ha’u ajuda ha’u nia feen no fahe responsabilidade,” nia dehan.
Marco nia kaben hatutan tan, “Depois de Programa POWER, ami rua tuir formasaun ne’e. Ha’u nia katuas-oan iha mudansa barak iha fahe responsabilidade uma-laran nian. Ami-nia família agora moris iha armonia no laiha violénsia.”
Ohin loron, Marco mehi atu habelar iha produsaun marmelada no hein katak nia oan sira sei kompleta edukasaun universitáriu no moris iha família ida ne’ebé hakmatek no armonia.
Nia istória hatudu oinsá poupansa, aprendizajen, no solidariedade bele nakfilak susar ba esperansa.
