Fokupers Promove Kampus Seguru no Livre husi Violénsia iha UNTL. Foto: Lensa Fokupers. Data: 13/11/2026
Dili, 13 Novembru 2026 – Fórum Komunikasaun Feto Timor-Leste (Fokupers) kontinua halo sosializasaun kona-ba Prevensaun Asédiu Seksuál no Violénsia Bazeia ba Jéneru (VBJ) ba estudante na’in 100 (Feto 49 no mane 51) iha Universidade Nasionál Timor Lorosa’e (UNTL), atividade ne’e halo iha Auditóriu Fakuldade Ekonomia iha UNTL, Kampus Sentrál Liceu, Dili. No hafoin remata sosializasaun kontinua kedas ho ensera atividade refere.
Sosialiazasaun ne’e, ho objetivu atu hasa’e estudante sira-nia koñesimentu kona-ba forma, kauza, no impaktu husi asédiu seksuál no VBJ, haburas atitude zero-toleránsia ba violénsia, no hametin sira-nia komprensaun kona-ba mekanizmu prevensaun, relata, no protesaun ba vítima liuhosi servisu seguru no konfidensiál.
Iha enseramentu, Vise-Reitór ba Asuntu Estudantil, Professora, Bia Ble Hitu Carvalho, hato’o apresiasaun ba Fokupers, Gabinete Apoiu Sosiedade Sivil (GASC), no AJHJ-TL ba sira-nia kolaborasaun hodi implementa atividade sosializasaun Kampus Seguru iha UNTL.
Nia subliña katak, inisiativa Kampus Seguru halo parte iha Programa Prinsipál UNTL nian ba Estrutura Foun 2026–2031, ho objetivu atu kria universidade ida ne’ebé sivilizadu, inkluzivu, no livre husi forma violénsia hotu-hotu, enkuantu hasa’e mós feto sira-nia partisipasaun iha asosiasaun estudante sira.
Liuhusi atividade ida-ne’e, estudante sira hetan enkorajamentu atu ko’alia, relata kazu sira asédiu seksuál nian, no hala’o papél ativu hodi kria ambiente kampus ne’ebé seguru no livre hosi violénsia. Aividade ida-ne’e mós garante partisipasaun inkluzivu liuhosi envolve Ema ho Defisiénsia atu nune’e ema hotu-hotu iha oportunidade hanesan atu asesu ba informasaun no partisipa iha diskusaun sira.
Atividade ne’e, hetan partisipasaun husi Vise-Reitór ba Asuntu Estudantil UNTL, Diretora Centro de Estudo de Género, Diversidade e Inclusão (CEGDI) Reprezentante Fokupers, Reprezentante AJHJ-TL no Provedór Estudante UNTL, no estudante sira husi Fakuldade Ekonomia, Fakuldade Direitu no Siensia Exata.
Fokupers hato’o agradesimentu ba GASC nia apoiu, AJHJ-TL nia kooperasaun, no CEGDI no ekipa UNTL tomak nia kolaborasaun hodi realiza kampus ida ne’ebé seguru, hanesan, inkluzivu, livre husi asédiu seksuál no violénsia bazeia ba jéneru.


