CRECHE Selebra Loron Mundiál Labarik. Foto: Lensa Fokupers. Data: 01/06/2026
Dili, 1 Juñu 2026; Fokupers Liuhusi divizaun Knua-Labarik (CRECHE) selebra Loron Mundiál Labarik nian (1 Juñu) ho ksolok no espíritu hamutuk. Selebrasaun ne’e sai nu’udar momentu importante atu fó hanoin ba ema hotu katak, labarik ida-idak iha direitu ba domin, edukasaun, protesaun, no oportunidade hanesan atu bele buras no dezenvolve ho óptimu.
Protesaun labarik no edukasaun mak fundasaun prinsipál atu forma jerasaun futuru ne’ebé saudavel, matenek, fiar-an, no iha karakter pozitivu. Ambiente seguru, saudavel, haksolok livre husi forma violénsia hotu-hotu krusiál ba labarik sira-nia kreximentu no dezenvolvimentu. Liuhusi edukasaun no protesaun ne’ebé loos, labarik sira bele dezenvolve sira nia potensiál tomak no prepara ba futuru ne’ebé nabilan liu.
Hodi komemora Loron Mundiál Labarik nian, CRECHE Fokupers nia manorin no estudante sira partisipa uluk iha série atividade edukasionál durante loron tolu nia laran.
Iha loron 28 Maiu 2026, Manorin no estudante sira hala’o asaun karidade ida hodi halibur doasaun sira nesesidade báziku no roupa hosi inan-aman sira. Atividade ida-ne’e ho objetivu atu kuda valór sira kuidadu nian, kompaixaun, empatia, fahe, no konxiénsia sosiál iha labarik sira hahú hosi idade ki’ik. Liuhusi atividade ida-ne’e, labarik sira aprende importánsia atu ajuda ema seluk no fahe ho sira ne’ebé presiza.
Liután, iha loron 29 maiu 2026, CRECHE Fokupers hala’o limpeza komunitária ho estudante sira. Atividade ida-ne’e dezeña atu hanorin importánsia atu mantein ambiente ne’ebé moos, haburas sentidu responsabilidade, no kuda iha labarik sira estilu moris ne’ebé moos no saudavel hahú hosi idade ki’ik. Liuhusi aprosimasaun divertidu no interativu, labarik sira hetan enkorajamentu atu komprende katak, limpeza maka responsabilidade ida ne’ebé fahe.
Eventu iha loron 1 Juñu 2026, ho selebrasaun Loron Mundiál Labarik nian ne’ebé partisipa hosi Manorin, estudante, inan-aman, no konvidadu sira. Selebrasaun ne’e moris, ho atuasaun oioin husi estudante sira, inklui atuasaun kanta, leitura poezia, kompetisaun, fashion show, jogu edukasionál, no distribuisaun prémiu no sertifikadu ba estudante sira.
Liuhusi atividade oioin ne’e, labarik sira la’ós de’it hetan esperiénsia di’ak maibé mós hetan oportunidade atu dezenvolve kriatividade, fiar-an, no abilidade komunikasaun, no mós hametin relasaun entre eskola, família, no komunidade.
Susesu hosi série atividade tomak ida-ne’e tanba dedikasaun no serbisu maka’as hosi manorin CRECHE Fokupers nian, no mós apoiu no kooperasaun besik hosi estudante sira-nia inan-aman. Kolaborasaun forte entre manorin sira no inan-aman sira maka fatór krusiál ida hodi kria ambiente aprendizajen ida ne’ebé pozitivu no apoia dezenvolvimentu olístiku labarik sira-nian.
Fokupers, liuhosi CRECHE, nafatin iha kompromisu atu fornese edukasaun no kuidadu ho kualidade, enkuantu garante katak, labarik ida-idak iha direitu atu buras, aprende, halimar, no dezenvolve iha ambiente ida ne’ebé seguru, inkluzivu, no nakonu ho domin. Selebrasaun Loron Mundiál Labarik nian iha tinan ida-ne’e sai hanesan lembransa ida katak investimentu di’ak liu ba nasaun nia futuru maka atu fornese kuidadu, protesaun no edukasaun di’ak liu ba labarik ida-idak.
