Sosializasaun kona-ba Prevensaun VBJ ba joven na’in 37 iha Fahisoi. Foto: Lensa Fokupers. Data, 14/05/2026
Aileu, 14 Maiu 2026– Fokupers hala’o sosializasaun kona-ba Prevensaun Violénsia Bazeia ba Jéneru (VBJ) ba joven na’in 37 (Feto 18 no mane 19), iha Suku Fahisoi, Postu-Administrativu Liquidoe, Munisípiu Aileu.
Atividade ne’e ho objetivu atu hasa’e foin-sa’e sira-nia komprensaun kona-ba konseitu VBJ, ninia impaktu sira, no pasu sira atu prevene violénsia iha família no komunidade.
Liuhosi sosializasaun ida-ne’e, partisipante sira hetan enkorajamentu atu komprende katak , VBJ la’ós de’it fó impaktu ba vítima sira nia fizikamente, maibé mós afeta sira-nia saúde mentál, relasaun sosiál, no komunidade. Foin-sa’e sira mós hetan enkorajamentu atu rekoñese forma oioin violénsia nian no komprende importánsia atu kria ambiente ida ne’ebé seguru, respeitu, no livre hosi diskriminasaun.
Fokupers fiar katak Foinsa’e sira hala’o papél importante ida hodi prevene VBJ. Tanba ne’e, sosializasaun ida ne’e sai hanesan plataforma aprendizajen ida ba foin-sa’e sira atu sai ajente ativu ba mudansa hodi promove igualdade jéneru no kultura kontra violénsia iha família no komunidade.
Iha sesaun abertura, Xefe Suku Fahisoi, Sra. Eugenia Ramos Fatima, enkoraja partisipante hotu atu tau atividade ne’e ho sériu no uza oportunidade ne’e hodi harii sosiedade ida ne’ebé seguru no respeita liu direitus umanus.
Nia mós subliña katak, foin-sa’e sira iha responsabilidade ne’ebé signifikativu hodi hakotu siklu violénsia no hametin respeitu ba direitu feto, labarik, no grupu vulneravel sira seluk.
Partisipante sira mós diskute pasu simples ne’ebé sira bele foti iha sira-nia moris loroloron atu prevene violénsia, hanesan haburas komunikasaun ne’ebé saudavel, respeita, no iha korajen atu relata hahalok violénsia iha sira-nia komunidade.
Atividade ne’e implementa ho apoiu finanseiru husi Misereor, hanesan parte ida husi esforsu kolaborativu hodi hasa’e koñesimentu públiku no enkoraja partisipasaun ativu husi joven sira hodi prevene VBJ iha Timor-Leste.
