Fasilita sistema rede referal ba parstisipantes sira iha Fahisoi, Foto: Lensa Fokupers, Data, 12-13/05/2026
Aileu, 12-13 Maiu 2026; Fokupers halo treinamentu kona–ba “Igualdade Jéneru, Violénsia Bazeia ba Jéneru (VBJ) ba Lideransa Komunitária hodi apoiu sistema Rede Referál” ba Konsellu suku no juventude na’in 28 (Feto 13 no Mane 15) iha Suku Fahisoi, Postu-administrativu Lequidoe, Munisipiu Aileu.
Treinamentu ne’e ho objetivu atu hasa’e lider komunitária no juventude sira nia komprensaun kona-ba konseitu Igualdade Jéneru no Violénsia Bazeia ba Jéneru (VBJ), enkuantu haforsa mós sira-nia kapasidade hodi fó apoiu ba vítima violénsia liuhosi rede referál iha nivel komunidade.
Aleinde Atu fornese koñesimentu báziku kona-ba akonsellamentu báziku hodi apoia vítima ka indivídu sira ne’ebé afetadu husi VBJ. Liuhusi treinamentu ida-ne’e, Atu hametin Lideransa lokal no Juventude sira-nia knaar nu’udar protetor ba komunidade sira, hodi oferese espasu ne’ebé seguru no amigavel ba ema ne’ebé iha esperiensia VBJ.
Treinamentu ne’e hala’o ho maneira partisipativu liu husi métodu interativu oioin hanesan diskusaun grupu, estudu kazu, no simulasaun jogu papél. Aprosimasaun ida-ne’e permite partisipante sira atu komprende di’ak liután situasaun sira iha mundu reál ne’ebé akontese iha sira-nia komunidade enkuantu mós pratika abilidade sira hodi hatán ho apropriadu no sensivel ba kazu violénsia.
Iha abertura, Xefe Suku Fahisoi, Sra. Eugenia Ramos Fatima, hato’o ninia apresiasaun ba FOKUPERS ba ninia kompromisu hodi hasa’e koñesimentu públiku kona-ba asuntu violénsia bazeia ba jéneru.
“Ami agradese tebes ba FOKUPERS tanba informasaun ne’ebé ita-boot sira hato’o ne’e importante tebes. Ami konsiente katak, atu muda koñesimentu públiku iha tempu badak susar, maibé uitoan-uitoan, mudansa sei akontese.”
Liuhusi atividade ida-ne’e, hein katak partisipante sira sei sai ajente ba mudansa iha ida-idak nia komunidade no hametin kolaborasaun iha sistema rede referral, hodi fó protesaun no apoiu di’ak liután ba vítima VBJ.
Atividade ne’e hetan apoiu fundus husi Misereor.
