Programa Aman ba Mudansa, iha sesaun dahaat-Namlesso. Foto: Lensa Fokupers. Data:16/05/2026
Aileu, 16 Maiu 2026 — FOKUPERS kontinua sesaun dahaat husi programa “Aman ba Mudansa” iha Namolesso, Postu Administrativu Lequidoe, ne’ebé envolve kaben-na’in na’in 15 iha atividade aprendizajen no reflesaun kona-ba saúde inan no kosok-oan, no relasaun família ne’ebé saudavel.
Programa ne’e ho objetivu atu hametin relasaun ne’ebé harmonia entre kaben-na’in sira liuhosi komunikasaun ne’ebé di’ak, respeitu ba malu, no partisipasaun hamutuk iha foti desizaun família nian. Liuhusi aprosimasaun ida-ne’e, FOKUPERS enkoraja mane sira atu hola papél ativu hodi suporta sira nia parseiru sira durante isin-rua no pós-partu.
Sesaun dahaat ne’e fasilita husi Sentru Saúde Komunitária Namolesso liu husi parteira Evalina da Conceicão, ne’ebé fó edukasaun kona-ba aspetu importante oin-oin kona-ba saúde inan no oan. Tópiku sira ne’ebé diskute inklui mudansa biolójiku sira durante isin-rua, importánsia hosi vizita pré-natál no Kuidadu Antenatal (ANC), nutrisaun ba feto isin-rua sira, benefísiu sira hosi fó-susubeen inan eskluzivu, sinál perigu sira durante no hafoin partu, no papél hosi mane sira hodi apoia inan no bebé sira. Partisipante sira mós hetan enkorajamentu atu komprende importánsia atu prevene violénsia durante isin-rua.
Diskusaun ne’e partisipativu no nakloke, hodi fornese espasu ba kaben-na’in sira atu fahe sira nia esperiénsia, esperansa, sentimentu, no dezafiu sira iha preparasaun ba partu. Partisipante sira rekoñese katak saúde inan no kosok-oan nian la’ós de’it responsabilidade feto sira-nian, maibé responsabilidade ida ne’ebé fahe hosi membru família hotu-hotu no komunidade.
FOKUPERS fiar katak edukasaun, komunikasaun saudavel, no mane nia involvimentu iha vida familia bele ajuda kria ambiente seguru, apoiu, no livre husi violensia. Prezensa ativu no kuidadu husi aman sira durante isin-rua no hafoin partu maka krusiál atu harii família sira ne’ebé saudavel no hanesan.
Programa “Aman ba Mudansa” hanesan esforsu ida hosi FOKUPERS nian hodi enkoraja transformasaun sosiál iha nivel komunidade, liuhosi envolve mane sira nu’udar ajente mudansa nian hodi apoia feto sira-nia direitu no moris-di’ak família nian.
Iha ámbitu atividade ne’e, FOKUPERS mós fornese atividade aprende liuhusi halimar ho labarik sira hodi fó espasu ba inan-aman sira atu partisipa ho ativu. Labarik na’in 15 partisipa ho ativu, aprende valór sira igualdade nian, respeitu ba malu, no moris lahó violénsia hosi idade ki’ik.
Programa ne’e finansia husi Misereor, ho apoiu tékniku husi The Asia Foundation-Nabilan, no NGO HAMNASA.
