Benefisiariu POWER, Tia Anita husi Oe-cusse. Foto:Lensa Fokupers. Data:10/04/2026
Ho tinan 60, Anita, faluk no inan ba oan na’in lima husi Munisípiu Oecusse, gasta ona nia moris barak hodi ultrapasa susar ho reziliénsia no determinasaun. Hafoin lakon nia la’en iha tinan 1997, nia mesak tau matan ba nia oan sira, hodi depende ba kuda batar, pimenta, no fehuk-ropa hodi fornese ai-han, edukasaun, no futuru di’ak liu ba nia família.
“Moris ne’e susar tebes.Ha’u hetan apoiu uitoan de’it, maibé ha’u nunka rende tanba ha’u hakarak ha’u-nia oan sira atu han no ba eskola,” Anita hanoin hikas.
Maski tinan barak nia laran serbisu maka’as, dezafiu finanseiru sira sai nafatin bareira ba Anita no nia oan sira.
Iha Abril 2025, Anita partisipa iha formasaun Jestaun Finanseira no Produsaun Agríkola liuhosi Programa Promosaun Feto liuhosi Empoderamentu no Direitu Ekonómiku (POWER), ne’ebé fasilita hosi FEEO no implementa husi World Vision Timor-Leste ho finansiamentu hosi Uniaun Europeia. Formasaun ne’e marka pontu mudansa ida iha nia moris.
“Ha’u aprende oinsá atu jere osan, hadi’a prátika to’os nian, no halo planu ba futuru.Uluk, ha’u iha koñesimentu uitoan de’it kona-ba jestaun finanseira.Agora ha’u sente fiar-an liu,” nia hateten.
Hafoin formasaun, Anita tama iha grupu Fatubijai Poupansa ba Transformasaun (S4T), iha ne’ebé nia hahú poupa beibeik no asesu ba empréstimu ki’ik hodi haburas nia moris. Hahú ho empréstimu US$50 atu fa’an bebidas no kréditu telefone, nia depois empresta US$100 hola sasan ba nia kios no US$150 atu habelar liután nia negósiu.
Ohin loron, Anita hala’o kios ki’ik ida hosi nia uma, hodi fornese rendimentu ida ne’ebé estavel liu ba nia família. Rendimentu adisionál sira mós permite ona nia atu hadi’a parte sira hosi nia uma no prepara di’ak liután ba gastu sira ne’ebé la espera.
“Grupu ida ne’e muda ona hau nia moris ho empréstimu sira ne’e, hau loke hau nia kios no hadi’a hau nia uma ha’u kontente tebes ho fatin ne’ebé ohin loron hau iha,” Anita fahe.
Aleinde hadi’a nia situasaun finanseira, Programa POWER hametin ona Anita nia konfiansa no independénsia.
Haree ba oin, Anita iha planu atu kontinua habelar nia kios liu husi hadi’a nia fasilidade no hasa’e variedade produtu ne’ebé nia fa’an hodi hetan rendimentu barak liu tan.
Nia hato’o nia agradesimentu ba Uniaun Europeia no parseiru Projetu POWER, FEEO, FOKUPERS, no World Vision Timor-Leste tanba ajuda transforma nia moris.
Anita nia viajen hanesan lembransa maka’as ida katak bainhira feto sira iha asesu ba koñesimentu, oportunidade finanseira, no apoiu komunidade, sira bele ultrapasa adversidade, hametin sira-nia família, no sai motor ba mudansa ne’ebé dura iha sira-nia komunidade.
