Treinamentu Mikro-Empreza ba Sobrevivente iha Manufahi. Foto: Lensa Fokupers
Manufahi, 20–21 Abril 2026 — FOKUPERS halo treinamentu mikro-empreza ba sobrevivente feto na’in 25 iha Munisípiu Manufahi nu’udar parte ida husi esforsu atu hametin feto sira-nia independénsia ekonómika no reziliénsia.
Treinamentu ne’e ho objetivu atu hasa’e kapasidade no abilidade sobrevivente sira nian nune’e sira bele harii moris ekonomia ne’ebé independente, livre husi forma violénsia oioin, tantu iha família nia laran no mós iha komunidade. Aleinde ne’e, partisipante sira hein atu sai modelu iha sira nia komunidade, inspira no motiva feto sira seluk atu hamriik no sai empoderadu.
Durante treinamentu loron rua, partisipante sira hetan komprensaun klean kona-ba modelu negósiu sira uza aprosimasaun Business Model Canvas, ne’ebé ajuda sira dezeña, jere, no dezenvolve sira nia negósiu sira iha maneira ida ne’ebé estruturadu liu.
Formasaun ne’e mós konta ho pesoál rekursu oioin no parseiru estratéjiku sira. Husi SERVE, partisipante sira hetan informasaun kona-ba prosesu rejistu negósiu no aspetu legál negósiu nian. Entretantu, KAEBAUK fahe koñesimentu kona-ba asesu ba apoiu finanseiru no servisu mikro-kréditu ba feto emprezária sira.
Aleinde sesaun téknika, emprezária feto ida fahe nia istória susesu harii negósiu, inklui dezafiu sira ne’ebé nia hasoru no estratéjia sira atu ultrapasa sira. Sesaun ida-ne’e sai hanesan momentu inspiradór ida ne’ebé fó motivasaun loloos ba partisipante sira atu koko nafatin no nunka rende.
Liuhusi treinamentu ne’e, FOKUPERS reafirma nia kompromisu atu apoia hakbiit feto sobrevivente sira, la’ós de’it iha termu protesaun maibé mós iha reforsu ba sira-nia ekonomia nu’udar fundasaun krusiál ba moris ida ne’ebé seguru, independente, no dignu liu.
Atividade ida ne’e ho apoiu fundus husi Yayasan Humanis, ne’ebé kontinua kontribui ba programa hakbi’it feto iha Timor-Leste.
