Partisipante sira halo diskusaun grupu kona-ba apoiu ba Sobrevivente sira. Foto: Lensa Fokupers. Data: 23/04/2026
Manufahi, 23 Abril 2026 — FOKUPERS hala’o diskusaun ho títulu “Fahe Matenek (sharing knowledge) ho Sobrevivente no Parte Interesada sira” iha Postu Administrasaun Same, Munisípiu Manufahi.
Atividade ida-ne’e fornese espasu seguru ida ba sobrevivente sira atu fahe sira nia esperiénsia moris nian, enkuantu hametin mós apoiu sosiál no empoderamentu ekonómiku.
Iha abertura ne’e, reprezentante Prezidente Autóridade Munispiu Manufahi, liuhusi Sekretáriu Asuntu Sosiál, hato’o nia apresiasaun no agradesimentu ba FOKUPERS ba atividade diskusaun ida-ne’e:
“Ita-boot sira nia servisu mós fó apoiu ba ami-nia atividade sira, no ami prontu atu kontinua fó apoiu ba ita-boot sira-nia esforsu iha komunidade nia le’et.”
Diskusaun ne’e ho objetivu atu hasa’e partisipante sira-nia koñesimentu kona-ba rekuperasaun ekonómika no empoderamentu, no mós haburas solidariedade komunidade nian hodi apoia sobrevivente sira. Aleinde ne’e, atividade ne’e sai hanesan plataforma ida hodi fahe prátika di’ak liu hosi sobrevivente sira ne’ebé harii ona ho susesu negósiu ki’ik no independente sira.
Oradór prinsipál sira marka prezensa iha diskusaun ne’e, inklui reprezentante husi SEFOPE ne’ebé diskute kona-ba oportunidade empoderamentu ekonómiku, no MSSI ne’ebé fó informasaun kona-ba apoiu sosiál ba sobrevivente sira. Importante hanesan, sobrevivente sira rasik sai hanesan oradór xave, fahe sira nia esperiénsia moris no sira nia viajen sira hodi rekupera hosi situasaun difisil sira.
Diskusaun ne’e hetan partisipasaun husi parte interesada oioin, inklui reprezentante Prezidente Autóridade Munisipiu Manufahi, autóridade lokál, Uma Paz Same, ativista Kokosa, Pradet, sobrevivente husi Violénsia Bazeia ba Jéneru (VBJ), no parte interesada sira seluk.
Liuhusi atividade ne’e, hein katak sobrevivente sira sei la’ós de’it sai benefisiáriu maibé mós sai ajente ba mudansa, inspira ema seluk no kontribui ativu ba dezenvolvimentu sosiál iha sira-nia komunidade.
Atividade ne’e apoiu fundus husi Yayasan Humanis.
