Fokupers kontinua implementa sesaun daneen husi Programa “Aman ba Mudansa”. Foto:Lensa Fokupers. Data:06/6/2026
Namolesso, 06 Juñu 2026 – Fokupers kontinua hatudu nia kompromisu hodi hametin kna’ar aman sira iha família, liuhosi sesaun ba dala neen hosi Programa “Aman ba Mudansa”, ne’ebé envolve kaben-na’in na’in 15 iha Suku Namolesso, Postu Administrativu Lequidoe, Munisípiu Aileu.
Atividade ida ne’e fó espasu ba inan no aman sira atu aprende hamutuk no fahe esperiénsia kona-ba importánsia apoiu família nian durante isin-rua, partu, no hafoin bebé moris. Liuhusi diskusaun interativu sira, partisipante sira aprofunda sira nia komprensaun kona-ba oinsá envolvimentu aman nian bele fó impaktu pozitivu ba saúde no moris-di’ak inan no oan nian.
Durante sesaun, partisipante sira mós pratika tékniku dada-iis (respirasaun) ne’ebé bele ajuda inan sira prepara ba partu. Aleinde ne’e, aman sira hetan enkorajamentu atu komprende forma oioin hosi apoiu emosionál no prátiku ne’ebé sira bele fornese ba sira nia parseiru sira durante isin-rua no partu. Atividade ne’e ho objetivu atu hasa’e konxiénsia katak, aman ida nia knaar la’ós de’it nu’udar sustentadór, maibé mós nu’udar kompañeiru ativu ne’ebé fó kuidadu, apoiu, no sentidu seguransa ba família.
Aleinde aprende kona-ba saúde inan no oan nian, atividade ne’e inklui mós sesaun “Halimar no Aprende (Play and Learning)”, ne’ebé enkoraja inan-aman sira atu suporta oan sira nia dezenvolvimentu liuhosi atividade halimar no interasaun pozitivu sira. Sesaun ida-ne’e fó oportunidade ba inan-aman sira atu komprende importánsia husi sira-nia envolvimentu iha sira-nia oan nia dezenvolvimentu husi idade ki’ik.
Iha situasaun atividade ne’e, aumenta liu tan ho atividade múzika no dansa oioin ne’ebé involve inan-aman no oan sira. Atividade sira-ne’e la’ós de’it fó divertimentu maibé mós hametin ligasaun emosionál sira iha família laran no apoia labarik sira-nia dezenvolvimentu sosiál no emosionál ne’ebé saudavel.
Liuhusi Programa “Aman ba Mudansa”, Fokupers haka’as-an atu hametin kna’ar aman sira nian iha kuidadu família nian no promove ambiente família ne’ebé forte, saudavel, no apoiu. Prezensa no envolvimentu aman sira iha vida família nian maka fatór importante sira ne’ebé kontribui ba moris-di’ak inan no oan sira nian, enkuantu kria mós fundasaun sólidu ida ba labarik sira nia dezenvolvimentu iha futuru.
Sesaun da-neen ne’e fasilita husi Sra. Lucia Fátima da Silva no Sr. Silveiro da Silva de Araújo, ne’ebé tulun partisipante sira iha diskusaun no atividade prátika oioin durante iha atividade tomak.
Programa “Aman ba Mudansa” finansia hosi Misereor ho apoiu tékniku hosi The Asia Foundation – Nabilan no NGO HAMNASA, hanesan parte ida hosi esforsu konjuntu ida hodi hametin moris-di’ak família nian no promove inan-aman ne’ebé ekuitativu no inkluzivu liu iha Timor-Leste.
