Sesaun dala-10 husi Programa “Aman ba Mudansa”. Foto:Lensa Fokupers. Data: 4/7/2026
Namolesso, 4 Juñu 2026 – Fokupers kontinua nia sesaun ba dala-10 hosi Programa “Aman ba Mudansa”, ne’ebé envolve kaben-na’in na’in 15 iha Suku Namolesso, Postu Administrativu Lequidoe, Munisípiu Aileu. Programa ne’e ho objetivu atu hametin aman no inan-aman sira-nia papél hodi harii família ne’ebé saudavel, igual, no livre husi violénsia.
Iha sesaun ba dala-10 ida-ne’e, partisipante sira esplora tema “Inan-Aman nia Impaktu,” hodi enkoraja inan-aman sira atu reflete kona-ba oinsá sira nia esperiénsia pasadu ho sira nia inan-aman, sira forma ona sira nia moris ohin loron, no mós oinsá esperiénsia sira-ne’e influensia maneira ne’ebé sira kuidadu sira nia oan rasik.
Liuhusi atividade reflesaun oioin no diskusaun grupu nian, partisipante sira hetan enkorajamentu atu identifika influénsia pozitivu no negativu ne’ebé sira simu hosi sira-nia inan-aman. Hafoin sira diskute kona-ba valór, atitude, no hahalok sira ne’ebé sira hakarak atu hatutan ba sira nia oan sira, enkuantu identifika mós padraun inan-aman nian ne’ebé presiza atu muda hodi prevene impaktu negativu sira ba jerasaun tuirmai.
Sesaun ida-ne’e mós ajuda partisipante sira dezenvolve vizaun fahe ida kona-ba família ne’ebé sira imajina. Hodi komprende esperiénsia sira iha pasadu no aprende hosi reflesaun sira-ne’e, inan-aman sira hetan enkorajamentu atu kria ambiente família ida ne’ebé nakonu ho domin no seguru ne’ebé suporta kreximentu no dezenvolvimentu labarik nian ne’ebé ótimu.
Fokupers subliña papél importante hosi prátika inan-aman nian ne’ebé saudavel iha dezenvolvimentu labarik nian. Liután, padraun inan-aman nian ne’ebé pozitivu maka dalan ida ne’ebé efetivu atu prevene violénsia doméstika no promove relasaun familiár sira ne’ebé bazeia ba respeitu, igualdade, komunikasaun di’ak, no apoiu ba malu.
Sesaun ba dala-10 hosi Programa “Aman ba Mudansa” fasilita hosi Sra. Lucia Fátima da Silva no Sr. Silveiro da Silva de Araújo, fasilitadór sira ne’ebé hetan formasaun espesiál hodi implementa programa ne’e. Liuhusi abordajen partisipativu, fasilitadór sira enkoraja partisipante sira atu fahe esperiénsia, aprende ba malu, no hametin sira-nia kompromisu atu harii família ne’ebé armonia no hanesan liután.
Programa “Aman ba Mudansa” hanesan inisiativa ida hosi Fokupers nian hodi hasa’e envolvimentu hosi mane sira nu’udar aman no parseiru sira hodi kria relasaun família nian ne’ebé saudavel, apoia moris-di’ak labarik nian, no promove igualdade jéneru iha nivel família no komunidade nian.
Aleinde ne’e, Fokupers mós fornese atividade aprende liuhusi halimar ho labarik sira hodi fó espasu ba inan-aman sira atu partisipa ho ativu. Labarik na’in 15 partisipa ho ativu, aprende valór sira igualdade nian, respeitu ba malu, no moris lahó violénsia hosi idade ki’ik.
Programa ne’e finansia husi Misereor ho apoiu tékniku husi The Asia Foundation – Nabilan no ONG HAMNASA.
