Luisa, Benefisiariu husi Programa POWER, Foto: Lensa Fokupers. Data: 8/04/2026
Ho de’it tinan 24, Luisa husi Munisípiu Oecusse prova daudaun katak determinasaun no oportunidade bele transforma moris. Hafoin remata eskola sekundária, nia labele kontinua nia edukasaun iha universidade tanba nia família nia limitasaun finanseira. La ho esperiénsia negósiu ka abilidade agríkola, nia iha oportunidade limitadu atu hetan rendimentu.
“Antes atu tuir formasaun ne’ebé fasilita husi FEEO, ha’u seidauk hatene hala’o negósiu ka kuda modo” Luisa hatete.
Iha tinan 2025, Luisa partisipa iha formasaun Produsaun Agríkola no Jestaun Negósiu liuhosi Programa Promosaun Feto liuhosi Empoderamentu Ekonómiku no Direitu (POWER), finansia hosi Uniaun Europeia no implementa hosi World Vision Timor-Leste iha parseria ho FEEO no FOKUPERS.
Hafoin remata formasaun, Luisa tama iha Grupu Poupansa Oel-Mau no asesu ba imprestimu US$50 hodi hahu negosiu ki’ik produsaun no fa’an dosi kazamentu iha nia komunidade.
Nia negósiu buras beibeik, fornese fonte rendimentu ne’ebé konfiável no permite nia atu hatán ba nia nesesidade uma-laran loroloron nian ho independente
“Uluk susar atu sosa nesesidade baziku, agora hau iha rendimentu rasik no bele sustenta hau nia an ho osan ne’ebe hau hetan” nia hatutan
Ba Luisa, Programa POWER sai liu fali oportunidade formasaun ida ida-ne’e ajuda ona nia atu harii konfiansa, dezenvolve abilidade prátika sira, no sai independente finanseiramente. Liuhusi apoiu hosi nia grupu poupansa, nia hetan ona koñesimentu no rekursu sira ne’ebé presiza atu hadi’a nia moris no planu ba futuru.
Inspiradu hosi nia viajen rasik, Luisa enkoraja feto-klosan sira seluk atu fiar iha sira-nia an rasik no simu oportunidade foun sira
“Ha’u enkoraja feto foin-sa’e sira seluk atu aten-brani, foti risku, no kontinua aprende.Labele depende de’it ba mane ka ita-nia família.Partisipa iha atividade sira ne’ebé harii ita-nia abilidade no esperiénsia atu nune’e ita-boot bele sai independente nunka ta’uk atu aprende.”
Luisa nia istória hatudu katak bainhira feto foin-sa’e sira iha asesu ba formasaun, oportunidade finanseira, no rede komunidade ne’ebé fó apoiu, sira bele harii meius subsisténsia ne’ebé sustentável, hetan konfiansa, no kria futuru ne’ebé nabilan liu ba sira-nia an no sira-nia komunidade.
