Fokupers halo sesaun ba dala 9 husi Programa “Aman ba Mudansa”. Foto:Lensa Fokupers. Data:26/6/2026
Namolesso, 26 Juñu 2026 – Fokupers kontinua nia Programa “Aman ba Mudansa” hodi hala’o nia sesaun ba dala-9 ne’ebé envolve kaben-na’in na’in 15 iha Suku Namolesso, Postu Administrativu Lequidoe, Munisípiu Aileu.
Sesaun ida ne’e, foku ba “Planeamentu Famíliar,” ho objetivu atu hasa’e feto no mane nia komprensaun kona-ba saúde reprodutiva, importánsia komunikasaun entre parseiru sira, no fahe responsabilidade iha foti desizaun kona-ba planeamentu familiar.
Liuhusi sesaun ida-ne’e, partisipante sira hetan enkorajamentu atu reflete kona-ba benefísiu sira hosi planeamentu familiár no importánsia hosi komunikasaun ne’ebé efetivu iha sira-nia relasaun. Liután neʼe, sira hetan informasaun neʼebé loos ho dalan oioin kona-ba planeamentu famíliar neʼebé iha.
Atividade ne’e fasilita husi Pesoal saúde iha Sentru Saúde Namolesso, Parteira Sofia da Costa Mendonça, ne’ebé esplika kona-ba métodu planeamentu familiar oioin, inklui sira-nia benefísiu, vantajen, no konsiderasaun hodi hili métodu ne’ebé di’ak liu ba família ida-idak nia nesesidade. Partisipante sira mós iha oportunidade atu halo diskusaun no husu perguntas direitamente ho pesoal saúde sira.
Iha ambiente partisipativu, partisipante sira envolve iha diskusaun interativu no drama grupu nian ne’ebé enkoraja fahe reflesaun kona-ba importánsia komunikasaun nakloke entre kaben-na’in sira. Liuhusi atividade sira-ne’e, partisipante sira diskute kona-ba benefísiu sira husi planeamentu familiár no oinsá foti desizaun hamutuk bele kontribui ba saúde inan no oan, estabilidade ekonómika família, no moris-di’ak uma-kain nian.
Programa “Aman Mudansa nian” kontinua enkoraja mane sira-nia envolvimentu ativu iha asuntu família nian, saúde reprodutiva, no inan-aman ne’ebé hanesan. Hodi envolve feto no mane sira hamutuk, programa ne’e hakarak harii relasaun família nian ne’ebé saudavel, armoniozu liu, no fó apoiu ba malu.
Aleinde ne’e, Fokupers mós fornese atividade aprende liuhusi halimar ho labarik sira hodi fó espasu ba inan-aman sira atu partisipa ho ativu. Labarik na’in 15 partisipa ho ativu, aprende valór sira igualdade nian, respeitu ba malu, no moris lahó violénsia hosi idade ki’ik.
Mensajen Xave:
Planeamentu famíliar hanesan responsabilidade ne’ebé fahe entre feto no mane. Liuhusi komunikasaun ne’ebé di’ak no asesu ba informasaun ne’ebé loos, família sira bele foti desizaun ne’ebé responsavel kona-ba totál oan, tempu, partu no espasu entre labarik sira, tan saúde no moris-di’ak membru família hotu-hotu nian.
Programa ne’e finansia husi Misereor ho apoiu tékniku husi The Asia Foundation – Nabilan no ONG HAMNASA.
